當初就係因為Dermes係第一間我聽到有激光脫毛中心向客人承諾永久，再加上名星效應同埋佢多年來專注做激光永久脫毛，所以就中左伏！
最初做的時候服務當然係非常好啦！去到門口，已經有人迎接我，環境又大又望住個海，仲有專人服侍我飲唔飲野，有菊蜜、紅棗水、薏米水，仲有小食，就算去到做療程，做完再book下一次都照顧周到，完全冇hard sell，咁貼心的服務令我全程就有種被寵愛的感覺，令我相信竟然有激光永久脫毛中心真係咁專業而唔係淨係搵錢。
完成2-3次underarm 療程之後，我的毛毛的確少左好多；但當我做到5-6次療程之後，發覺剩低的十幾廿條毛仍然喺度，佢地話一般情況下6次療程後，毛毛應該已經除去達80-90%，可能因為我以前用的剃毛方法唔正確而令到角質層變厚，所以叫我買佢地公司的去角質產品Gel Plus試下。咁我見幾百蚊咪信佢試下囉，點知用完之後去再做多左幾次療程都係冇用；最後佢地同我講我的情況應該要做一個去角質的treatment，一共做8次，個Package大概6千幾蚊，做完個underarm會又白又滑之餘，再打Laser就可以完全去除剩低的毛毛。
聽佢咁講我真係有少少嬲，我反問佢當初我join的時候係承諾1個價錢，任脫直至去除所有毛毛，宜家又同我講要加錢join 另一個plan？佢地回應我話因為我的角質層厚的問題，就算繼續嚟打Laser，結果都會一樣就係打唔走淨低的毛毛，所以必須要做去角質的treatment！我當下就話我唔會俾錢，你地承諾永久保證脫到滿意為止就必須幫我解決！
就係咁我再book時間去做Treatment就愈來愈難，照顧開我嘅治療師都轉埋人，我去做每一次佢地都繼續sell 我，最後我怕佢再煩我，就冇再去做Treatment了！ 結果我仍然要用剃刀解決我剩低的毛髮！
呢次的經歷， 令我唔再相信這些大規模宣傳的名星效應激光永久脫毛中心了，佢地所標榜的1個價錢包永久任脫只係取巧，到最後都幫唔到我徹底解決問題，以後再搵脫毛中心都最緊要係部儀器要專業，同埋銷售手法要有良心!
留言列表
